ბავშვის უსაფრთხოება ონლაინ სივრცეში

დღევანდელი ბავშვები ისეთი ინტენსივობით სწავლობენ, თამაშობენ და ურთიერთობენ ონლაინ, როგორიც არასოდეს ყოფილა. ინტერნეტი საოცარ შესაძლებლობებს აძლევს მათ განათლებისთვის, შემოქმედებისთვის და მეგობრობისთვის. თუმცა, ამასთან ერთად, გაჩნდა სერიოზული რისკები, როგორიცაა ონლაინ ბულინგი, გრუმინგი, სექსუალური ძალადობა და ექსპლუატაცია. ასევე, იმატებს ხელოვნური ინტელექტით შექმნილი ბავშვზე სექსუალური ძალადობის მასალები.

ონლაინ ძალადობა, მათ შორის სექსუალური ძალადობა და ექსპლუატაცია რეალური საფრთხეებია, რომლებიც სერიოზულად აზიანებს მათ ჯანმრთელობას, ნდობას და მომავალს.

ონლაინ ძალადობისა და ექსპლუატაციის მხრივ, განსაკუთრებულად მაღალი რისკის ქვეშ არიან შეზღუდული შესაძლებლობის მქონე ბავშვები. ისინი, კომუნიკაციის სირთულეების ან გადაჭარბებული ნდობის გამო, ხშირად უფრო ადვილად ხვდებიან მოძალადეთა სამიზნეები. მათი დაცვა უმნიშვნელოვანესია.

ყოველი ბავშვი იმსახურებს უსაფრთხოებას – მათ შორის ონლაინ სივრცეშიც! ბავშვებს სჭირდებათ და იმსახურებენ უსაფრთხო ციფრულ სამყაროს. მნიშვნელოვანია შევქმნათ უსაფრთხო გარემო ბავშვისთვის და გავაძლიეროთ ისინი, რომ მათ ისარგებლონ ინტერნეტით თავდაჯერებულად, და არა შიშით.

განსაკუთრებით მნიშვნელოვანია, რომ მშობლებმა აქტიური როლი შეასრულონ ბავშვების ონლაინ უსაფრთხოების დაცვაში. თუმცა, ბევრი მშობელი ნაკლებად არის ინფორმირებული ონლაინ სექსუალური ძალადობის შესახებ და ხშირ შემთხვევებში უჭირთ თანამედროვე ტექნოლოგიების გამოყენება.
ბავშვებისთვის უსაფრთხო ციფრული სამყაროს შესაქმნელად, საჭიროა მრავალმხრივი მიდგომა, რომელიც მოიცავს განათლებას, ტექნოლოგიებს, სამართლებრივ მხარდაჭერას, ინფორმირებულ პოლიტიკას და სხვადასხვა სექტორის თანამშრომლობას.

მშობლებს, მზრუნველებს და ყველას, ვინც ჩართულია ბავშვთა აღზრდის საკითხებში:

• ესაუბრეთ ბავშვებს ღიად, ასწავლეთ უსაფრთხო ონლაინ ქცევა და გამოიყენეთ ისეთი ინსტრუმენტები, რომლებიც უსაფრთხოდ და პატივისცემით გააკონტროლებს მათ ციფრულ სივრცეს.
• შეისწავლეთ ბავშვთა ონლაინ სექსუალური ექსპლუატაციის და ძალადობის თავიდან აცილების სტრატეგიები, მათ შორის გრუმინგის (ბავშვის ნდობის მოპოვება და შემდეგ გამოყენება) და ონლაინ ძალადობის ნიშნები და მათი გამოვლენის მექანიზმები.
• გაიძლიერეთ ცოდნა დაბალანსებული მშობლობის მიდგომებზე, რომლებიც აქცენტს სანდოობასა და უსაფრთხოებაზე აკეთებს.
• შექმენით უსაფრთხო გარემო, სადაც ბავშვები თავს კომფორტულად იგრძნობენ და შეძლებენ თავიანთი პრობლემების გაზიარებას.

საგანმანათლებო ორგანიზაციებს:

• მშობლებს, ხშირ შემთხვევაში, სჭირდებათ ციფრული უსაფრთხოების შესახებ განათლება. მნიშვნელოვანია შეიქნას ადვილად ხელმისაწვდომი ინფორმაციები და ტრენინგები, რომლებიც მშობლებს ციფრული უსაფრთხოების შესახებ ცოდნისა და უნარების გამომუშავებაში დაეხმარება.
• ითანამშრომლეთ მშობლებთან, რათა შეიმუშაოთ და დანერგოთ კიბერუსაფრთხოების პოლიტიკა სკოლებსა და სხვა სასწავლო დაწესებულებებში. უმნიშვნელოვანესია მასწავლებლების გადამზადება და ონლაინ საფრთხეების შეტყობინების მარტივი მექანიზმების დანერგვა და მის შესახებ ბავშვთა ინფორმირება.

ტექნოლოგიურ კომპანიებს:

• შექმენით პრაქტიკული და მარტივად გამოსაყენებელი ინსტრუმენტები მშობლებისთვის, რათა მათ ბავშვების უსაფრთხო ინტერნეტ-გამოყენება უზრუნველყონ. ასეთ ინსტრუმენტებში უნდა შედიოდეს ბავშვებისთვის დამაზიანებელი კავშირების და ძალადობის ნიშნების შესახებ ნათელი ნიშნულები, რისკების შემთხვევაში ოჯახის წევრებთან დაკავშირების ფუნქცია, უსაფრთხოების სიის (safety checklists) გამოყენება, სახიფათო კავშირების, მაგალითად გრუმინგის (grooming alerts) და ძალადობის ამოცნობის შესაძლებლობა. ყველა ეს საშუალება ხელმისაწვდომი უნდა იყოს ადგილობრივ ენებზე, ისევე როგორც მარტივი ინსტრუქციები და უსაფრთხო ინტერფეისები მოწყობილობებზე წვდომისთვის.
• დააფინანსეთ მშობლების ციფრული უნარების განვითარებაზე მიმართული პროგრამები, რათა ოჯახებმა შეძლონ ონლაინ რისკების ეფექტიანად მართვა.
• გააუმჯობესეთ ასაკის გადამოწმების სისტემები, გამოიყენეთ საიმედო და ეფექტური მეთოდები მხოლოდ მარტივი პოპ-აპების (pop-up) ნაცვლად, რათა ბავშვებმა ვერ მიიღონ წვდომა მავნე კონტენტზე.
• გამოიყენეთ მარტივი, ყველასთვის გასაგები ენა კონფიდენციალურობის პარამეტრებსა და პოლიტიკაში. შექმენით ინტუიციური და ასაკთან შესაბამისი ინტერფეისები.
• ჩართეთ უსაფრთხოების შესახებ გზავნილები პლატფორმის კამპანიებში, რათა მშობლებსა და საზოგადოებას შორის ცნობიერება გაიზარდოს.
• უზრუნველვყავით სასწავლო მოდულები, რომლებიც მშობლებს დაეხმარება ონლაინ ბავშვთა სექსუალური ექსპლუატაციის და ძალადობის პრევენციასა და ძალადობის შემთხვევებზე რეაგირებაში.
• იმუშავეთ პარტნიორებთან ერთად კონფიდენციალურობის, შეტყობინების მექანიზმების, მშობლის კონტროლის სისტემებისა და ასაკის გადამოწმების სისტემების გასაძლიერებლად.

მთავრობას:

• განათლება და ცნობიერება: მნიშვნელოვანია, რომ ციფრული წიგნიერება და ონლაინ უსაფრთხოება ინტეგრირდეს მშობლებზე ორიენტირებულ საგანმანათლებლო პროგრამებში. პარტნიორობა დამყარდეს არასამთავრობო ორგანიზაციებთან, რათა ჩატარდეს კამპანიები მშობლებისთვის, ბავშვებისთვის და პედაგოგებისთვის ისეთ საკითხებზე, როგორებიცაა გრუმინგი, თაღლითობები და კონფიდენციალობა, სექსუალური ძალადობა და ექსპლუატაცია.
• რესურსების გამოყოფა: გამოიყოს დაფინანსება მშობლების განათლებისთვის ბავშვთა ონლაინ სექსუალური ექსპლუატაციის და ძალადობის საკითხებზე, მათ შორის ცნობიერების ამაღლებისთვის, იურიდიული დახმარებისთვის, კონსულტაციისა და მსხვერპლთა მხარდაჭერისთვის. პრიორიტეტად განისაზღვროს მხარდაჭერა მოწყვლადი ჯგუფებისთვის, როგორიცაა მარტოხელა მშობლები, დაბალი განათლების მქონე პირები, შეზღუდული შესაძლებლობის მქონე ბავშვების მშობლები.
• სამართლებრივი და პოლიტიკის ჩარჩოები: დამტკიცდეს მკაფიო და ხელმისაწვდომი კანონები, რომლებიც მოიცავს გრუმინგს, სექსტინგს, ღრმა-ფეიქებს (deepfakes) და ხელოვნური ინტელექტის არასწორ გამოყენებას. გავრცელდეს გამარტივებული სამართლებრივი ინფორმაცია, რათა მშობლებს გაუადვილდეთ იმ დაცვის მექანიზმების გაგება, რომლებიც არსებობს მათი ბავშვების უსაფრთხოებასთან დაკავშირებით.