ბავშვზე და ახალგაზრდაზე მორგებული მომსახურების გაძლიერება ძალადობის მსხვერპლი ბავშვების და ახალგაზრდებისთვის თბილისში, ზუგდიდში და ბათუმში - ევროკავშირის მიერ მხარდაჭერილი პროექტის პრეზენტაცია.
პარასკევს, 28 აპრილს 11:00 საათზე, საქართველოს პარლამენტის ეროვნული ბიბლიოთეკის საკონფერენციო დარბაზში გაიმართა ევროკავშირის მიერ მხარდაჭერილი პროექტის „ადვოკატირება ბავშვთა და ახალგაზრდების დასაცავად“ პრეზენტაცია. ღონისძიებაზე მისასალმებელი სიტყვები წარმოთქვეს საქართველოს საზოგადოებრივი ჯანდაცვის ფონდის აღმასრულებელმა დირექტორმა, ქალბატონმა ლია სარალიძემ, საფრანგეთის საელჩოს მრჩეველმა თანამშრომლობის საკითხებში და საქართველოში ფრანგული ინსტიტუტის დირექტორმა, ბატონმა ჟან-ივ ლავუარმა, საქართველოს სახალხო დამცველის აპარატის ბავშვის უფლებების ცენტრის უფროსმა, ქალბატონმა მაია გედევანიშვილმა, გაეროს ბავშვთა ფონდის ბავშვთადაცვისპროგრამისხელმძღვანელმა, ბატონმა პიერ ფერიმ და სოციალური მომსახურების სააგენტოს სოციალური პროგრამების დეპარტამენტის უფროსმა, ქალბატონმა მარი წერეთელმა.
პროექტი „ადვოკატირება ბავშვთა და ახალგაზრდების დასაცავად“ მიზნად ისახავს საქართველოში ბავშვთა და ახალგაზრდების დაცვის სისტემის გაუმჯობესებას. პროექტის პრეზენტაციის ღონისძიებამ გააერთიანა სახელმწიფო, ადგილობრივი და საერთაშორისო არასამთავრობო ორგანიზაციების წარმომადგენლები, გადაწყვეტილების მიმღები და სხვა დაინტერესებული პირები თბილისიდან, ზუგდიდიდან და ბათუმიდან, რომლებიც მუშაობენ ბავშვთა და ახალგაზრდების უფლებათა დაცვის საკითხებზე. შეხვედრა მიზნად ისახავდა დამსწრე საზოგადოებისთვის პროექტის ამოცანების, მოსალოდნელი შედეგების, დაგეგმილი საქმიანობების გაცნობას და თანამშრომლობის შესაძლებლობების განხილვას. ასევე, პროექტის ფარგლებში დაფუძნებულ თბილისის, ზუგდიდის და ბათუმის ბავშვთა და ახალგაზრდების ადვოკატირების ცენტრების საქმიანობის წარდგენას. თბილისის, ზუგდიდის და ბათუმის ადვოკატირების ცენტრები საკონსულტაციო და სარეაბილიტაციო მომსახურებას აწვდიან ოჯახში ძალადობის და სექსუალური ძალადობის მსხვერპლ ბავშვებს, ახალგაზრდებს და მათი ოჯახის წევრებს.
საქართველოს საზოგადოებრივი ჯანდაცვის ფონდი პროექტს ახორციელებს რეაბილიტაციის და განვითარების საქველმოქმედო ცენტრ „თანაზიართან”, საზოგადოებრივ ორგანიზაცია „სთეფ ფორვარდთან“ და ბავშვის საერთაშორისო კათოლიკურ ბიუროსთან (International Child Catholic Bureau (BICE)) თანამშრომლობით. პროექტის ასოცირებული პარტნიორები არიან ბათუმის შოთა რუსთაველის სახელმწიფო უნივერსიტეტი და ბავშვთა საერთაშორისო ჰელპლაინი (Child Helpline International (CHI)).
ღონისძიება დასრულდება პროექტის მოწვეული ექსპერტის, ქალბატონ მარტინ ნისის წიგნის „ძალადობის მსხვერპლი ბავშვი, დარღვეული დუმილის დადებითად გამოყენება“ პრეზენტაციით. აღნიშნული ნაშრომი განკუთვნილია ბავშვებთან მომუშავე სპეციალისტებისთვის და ფართო საზოგადოებისთვის. წიგნის ქართულენოვანი ვერსია გამოიცა საქართველოს საზოგადოებრივი ჯანდაცვის ფონდის ორგანიზებით, საქართველოში საფრანგეთის საელჩოს და BICE – ს ფინანსური მხარდაჭერით. წიგნის პრეზენტაცია გაიმართება ავტორის მონაწილეობით.
პრეზენტაციის ჩატარების დრო და ადგილი: 28 აპრილი, 2017 წელი; 11:00-დან 15:00-მდე. ეროვნული ბიბლიოთეკის საკონფერენციო დარბაზი;
მისმართი: გუდიაშვილის ქუჩა #7, ეროვნული ბიბლიოთეკის III - ე კორპუსი.
ღონისძიების ორგანიზატორი: საქართველოს საზოგადოებრივი ჯანდაცვის ფონდი
მისამართი: ედიშერ მაღალაშვილის ქ. #4, ბინა 1; 0186 თბილისი, საქართველო
ტელეფონი: (032) 2 421422;ბავშვთა დახმარების ხაზი: 116 111
ელ-ფოსტა: info@phf.org.ge; ვებ-გვერდი: http://phf.org.ge
საკონტაქტო პირები: მარიამ მასხულია, პროექტის კოორდინატორი (ელ-ფოსტა: m_maskhulia@phmdf.ge,), დავით ხუჭუა, მომსახურების მენეჯერი (ელ-ფოსტა: d_khuchua@phf.org.ge,).
